Questo sito utilizza i cookie per fornire la migliore esperienza di navigazione possibile. Continuando a utilizzare questo sito senza modificare le impostazioni dei cookie o cliccando su "Accetta" permetti il loro utilizzo.

Chiudi

Ekspozicio “Omaĝo al Vittorio Morelli”

Foto della scultura in gesso: Cristo Risorto, 1928 circa

de la 12a de Marto ĝis la 17a de Aprilo,
Komplekso Vanvitelli (Mole Vanvitelliana), Banchina di Chio, Ancona

La kontinueco de arto en la evoluado de skulptarto disvolviĝas ankaŭ tra “Omaĝo al Vittorio Morelli”, la ekspozicio kiu, apud kaj kune kun “La memoro pri antikveco. D’après l’antique” estis inaŭgurita la 12an de Marto en Komplekso Vanvitelli. Kelkaj liaj gravaj kaj signifoplenaj verkoj aperas ankaŭ en tiu ekspozicio.

Vittorio Morelli naskiĝis en Ancona (1886-1968). Skulptisto de plastika edukado klasikisma, sed ankaŭ projektisto kaj arkitekto; personeco apartiĝema sed samtempe idealisme eferveska, li senlace laboris dum la tuta vivo, eĉ dum la dekjara servo de la patrujo kiel soldato kaj oficiro en la du mondmilitoj, en la riĉeco de la priformaj solvoj, ĉiame kaj ekskluzive fidela al sia intensa amo al arto.

Kunlaboranto de arkitekto Guido Cirilli sed ankaŭ de Cesare Bazzani, aktiva en multaj Markiaj urboj, li tiom multe amis ankonon, ke li nedisigeble kunligis sian daŭran kaj altvaloran agadon al la travivaĵoj de la materia kaj kultura rekonstruo de la urbo.

La ekspozicio, laŭ plano de Massimo Di Matteo, kun Scienca Komitato el Giuliano De Marinis, Roberto Farroni, kaj Aldo Grassini, prezentas maketojn, plastikajn verkojn kaj skulptaĵojn kaj volas omaĝi al artisto tre sindonema kaj grandtalenta, plurflanke ne komprenata aŭ ne plene konata.

Katalogo eldonita de Muzeo Omero enhavas tekstojn de Fabiola Brugiamolini, Massimo Di Matteo kaj Roberto Farroni.

El la katalogo omaĝo al Vittorio Morelli iniciatita de la Ŝtata Palpsenta Muzeo Omero aparte feliĉigas min pro diversaj kialoj. Pro la decido okazigi ĝin kiel flankan eventon de la ekspozicio “La memoro pri antikveco. D’après l’antique” per kiu komenciĝas prestiĝa kunlaborado kun Muzeo Louvre, kaj pro tio, ke per la ekspozicio pri Morelli ni omaĝas aŭtentikan artiston, kies valoron ni devos ankoraŭ priesplori kaj primediti. Hodiaŭ, danke al la pasio de Massimo di Matteo, ni strebas restarigi la veron pri la verko de Vittorio Morelli, kiu certe meritas plian pristudadon, tiel ke evidentiĝu en sia tuta amplekso la kultura kaj civila ligilo inter la eklektikismo de la artisto kaj lia urbo.

Krome, mi dankeme konscias, ke la ekspozicio ebligas al ni rememorigi, per rekunigo de kelkaj fadenoj de la kultura teksaĵo de ŝi plektita, la neforgesitan Fabiola Brugiamolini pro ŝia elstara laboro en la pristudado kaj remalkovro de iuj artaj valoroj forgesitaj aŭ ne sufiĉe konataj aŭ ŝatataj.

Fabiola, kiel la unua, malkovris la grandegan valoron ene de la verkoj de Vittorio Morelli, kaj tial, sen retoriko, mi volas diri, ke ŝi plenvive ĉeestas n la ekspozicio, kiu, krom ŝuldata omaĝo al la artisto, reprezentas ankaŭ komunan senton per spuroj de arta mozaiko kaŝa kaj ideala, kiu ne devas esti forgesita.

Utilaj informoj

Horoj de vizitoj: ĉiutage inter 15.30 kaj 19.30 (laŭ interkonsento eblas ankaŭ matena malfermo por grupoj de lernantoj); dimanĉe inter 9.30 kaj 12.30 kaj inter 15.30 kaj 19.30; fermita lunde. Fermo: la 1an de Majo.

prezo: 2,00 plena; 1,50 lernantoj, grupoj (almenaŭ 10-homaj);
5,00 familia bileto; 1,00 lernantaroj; senpaga por handikapitoj kaj akompanantoj, infanoj ĝis 6-jaraj.
Gvidataj vizitoj laŭ interkonsento por minimume 10 homoj 1,00 aldone al la enirbileto.

Didaktikaj laboratorioj por lernejoj 1,50 por ĉiu lernanto aldone al la enirbileto; senpaga por instruistoj.

Por informoj: Ŝtata Palpsenta Muzeo Omero, telefono 071.2811935, fakso 071.2818358, info@museoomero.it.

Ekspozicio “La Memoro pri antikveco. D’après l’Antique” el Muzeo Louvre

Nike di Samatrocia

De la antikvaj skulptartaj verkoj ĝis ties kopioj kaj imitaĵoj.
De la 12a de Marto ĝis la 26a de Junio, Konplekso Vanvitelli (Mole Vanvitelliana), Banchina di Chio, Ancona.

La elserĉado de antikveco estis ĉiam stimulo kaj motoro por la revekiĝo de beleco kaj kulturo; en Francio kaj Italio la komuna memoro pri revata antikveco igis arton kaj artistojn esplori kaj reinterpreti antikvecon, ĉerpante el ĝi inspiron.

La Memoro pri Antikveco. D’après l’Antique (40 verkoj, plejparte skulptaĵoj, dismetitaj laŭ fascina kaj malkutima ekspozicia vojo en la salonoj de Vanvitelli), ekirante de famaj verkoj de la helena-romia skulptarto, volas pruvi, ke antikveco estis ne nur absoluta kompara modelo por la artistoj, sed ankaŭ fonto de ĝuo por la publiko, kiu postulis ties disvastigon.

Apudmetante kelkajn el la ĉefverkoj troviĝantaj en Muzeo Louvre al aliaj verkoj el la kolekto de Muzeo Omero kaj de la Intendantejo pri arkeologiaj riĉaĵoj de la Regiono Markio, oni reliefigas manierojn kaj teknikojn, per kiuj oni kopiis, ĉizis, reproduktis, imitis, citis kaj disvastigis la ĉefverkojn de la antikveco, kaj kiel la rigardo de iliaj admirantoj transformis, fojfoje eĉ misformis ilin.

Estas ekspoziciitaj ne nur kopioj, sed ankaŭ muldaĵoj laŭ la originalo, kiuj rakontas la memoron kaj disvastiĝon de arto: de la Samotraca Venkantino al la Milosa Venuso en la diversaj reproduktaĵoj, de la bronza “Infano kun dorno”al la Marko Aŭrelio de Kapitolo (modelo por kapiteloj kaj statuoj), al la Gladiatoro Borghese giganta dinamika bildo de Agazio, kiu fariĝis plezurdona statueto fandita el bronzo far kolektantoj, aŭ modlita el argilo de Nicolas Coustou, skulptisto de Ludoviko XIV. La kapo de la Laokoono, apartigita de sia monumenta kunteksto, kaj la severa vizaĝo de la pseŭdo-Seneko fariĝas esprimmodeloj reellaboritaj de la skulptistoj de la deksepa jarcento.

La du muzeoj skulptarto estas la ununura artformo perceptebla pere de la palpsento kaj disponiganta al homoj kun vidhandikapo la eblecon de artĝuado. Aliflanke muldaĵoj estas laŭcele la bazo por edukado de artistoj kaj samtempe fonto de ĝuado por kolektantoj. La simbiozo skulptaĵo-muldaĵo fariĝas do la sola objektiva rimedo por disvastigo de arta kono inter nevidantoj.

La palpgalerio de Muzeo Louvre, la unua tiaspeca en franca muzeo, kaj Muzeo Omero, la unua kaj sola ŝtata palpsenta muzeo en Italio estis pioniroj sur la kampo de palpsenta interrilatigo kaj ankaŭ pere de la nuna ekspozicio volas emfazigi sian komunan projekton: igi la artajn trezorojn alireblaj al publiko kun vidaj handikapoj, samtempe disponigante por la tuta publiko aldonan kaj pli profundan komprenvojon.

Scienca Komitato:
Aranĝantoj de la ekspozicio estas Geneviève Bresc-Bautier kaj Cyrille Gouyette.
La Sciencan Komitaton konsistigas Geneviève Bresc-Bautier, Giuliano de Marinis, Massimo Di Matteo, Roberto Farroni, Cyrille Gouyette, Aldo Grassini.
La ekspozicion planis Muzeo Louvre el Parizo kaj la Ŝtata Palpsenta Muzeo Omero el Ancona kunlabore kun la Intendanto pri Arkeologiaj Riĉaĵoj de Markio kaj la Politeknika Universitato de Markio, sub patroneco de la Ministerio pri Kulturaj Riĉaĵoj kaj Agado,de la Ministerio pri Instruado, Universitato kaj Sciencaj Esploroj, de la Regiono Markio, de la Provinco Ancona kaj de la Komunumo Ancona.

Arta kontinueco en la evoluo de skulptarto.
La aranĝo en Komplekso Vanvitelli ampleksas ankaŭ du ekspoziciojn de nuntempa arto.
Omaĝo al Vittorio Morelli (de la 12a de Marto ĝis la 17a de Aprilo) laŭplane de Massimo Di Matteo kaj Varpo el lignaĵoj (de la 23a de Aprilo ĝis la 26a de Junio) dediĉita al LorenoSguanci laŭplane de Leo Strozzieri, kun la celo evidentigi, pere de la evoluado de skulptarto, la kontinuecon de arta esplorado.

Plia ŝanco: kadre de la ekspozicioj la didaktikaj servoj de Muzeo Omero ofertas, de Aprilo ĝis Junio, renkontiĝojn kun fakuloj, interesajn rektajn spertojn kun laboratoria praktikado por la publiko kaj la lernantaroj.
Horoj de vizitoj: ĉiutage inter 15.30 kaj 19.30 (laŭpete eblas matena malfermo por grupoj de lernantoj); dimanĉe inter 9.30 kaj 12.30 kaj inter 15.30 kaj 19.30; fermita lunde kaj la 1an de Majo.

Merkredon la 4an de Majo malfermita matene kaj posttagmeze.
Enirprezo: eŭroj 2,00 plena; eŭroj 1,50 lernantoj, grupoj (minimume 10-homaj); eŭroj 5,00 familia bileto; eŭroj 1,00 lernejoj; senpaga por handikapitoj kaj akompanantoj, infanoj ĝis 6-jaraj.
Gvidataj vizitoj laŭ interkonsento por minimume 10 homoj eŭroj 1,00 aldone al la enirbileto.
Didaktikaj laboratorioj por lernantaroj eŭroj 1,50 por ĉiu lernanto aldone al la enirbileto. Senpaga por instruistoj.

Por informoj: Ŝtata Palpsenta Muzeo Omero, telefono 071.2811935,  fakso 071.2818358, info@museoomero.it